Deniz Undaw zawoddan dünýä çempionatynyň ýyldyzyna çenli ýol geçdi

Germaniýanyň milli ýygyndysynyň hüjümçisi Deniz Undaw 2026-njy ýyldaky dünýä çempionatynyň toparçalaýyn tapgyrynda iň köp netijeli hereket eden futbolçy hökmünde tapawutlanýar. Kot-d’Iwuaryň milli ýygyndysy bilen geçirilen duşuşykda ätiýaçdan meýdança çykyp, iki gol geçiren hüjümçi Germaniýa 2:1 hasabyndaky ýeňşi sowgat etdi we toparynyň pleý-off tapgyryna wagtyndan öň çykmagyny üpjün etdi.

Şeýlelikde, 28 ýaşly futbolçy iki duşuşykda bary-ýogy 62 minut oýnap, üç goluň we iki asistiň awtory boldy. Bäş netijeli hereket bilen ol häzirki wagtda dünýä çempionatynyň iň täsirli futbolçysydyr.

Kot-d’Iwuar bilen geçirilen duşuşykda Denis Undaw 68-nji minutda hasaby deňledi, 90+4-nji minutda bolsa ýeňiş goluny geçirdi. Ol şeýlelikde 1990-njy ýylda kamerunly Roje Milliýanyň goýan rekordyny gaýtalady. Şol wagt Milliýa hem ätiýaçdan meýdança çykyp, bir dünýä çempionatynda dört netijeli hereketiň awtory bolupdy.

Emma Undawyň futbol ýolunyň başlangyjy ýeňil bolmandy. Ol 14 ýaşynda «Werderiň» akademiýasyndan boýunyň pesligi we beden gurluşynyň gowşaklygy sebäpli çykaryldy. Şondan soň ýaş futbolçy höwesjeň toparlarda we Germaniýanyň aşaky ligalarynda özüni görkezmäge mejbur boldy.

Onuň professional futboldaky ilkinji topary dördünji ligada çykyş edýän «Hawelse» boldy. Şol döwürde Undaw hüjümçi däl-de, ýarymgoragçy hökmünde oýnaýardy.

Topardan hepdede bary-ýogy 100 ýewro gazanýan futbolçy goşmaça gazanç etmek üçin zawodda lazer enjamynyň operatory bolup işledi. Her gün irden sagat dörtde oýanýan Undaw sekiz sagatlyk iş çalşygyny tamamlandan soň, türgenleşige gidýärdi.

Soňky ýyllarda onuň futbol karýerasy çalt ösüp başlady. «Ştutgart» toparyna geçeninden soň, köp ýyllap habarlaşmadyk adamlar oňa ýazyp başladylar. Kimdir biri bilet sorady, başga biri köýnekçe isleýärdi. Bu ýagdaýdan ýadan futbolçy ähli sosial torlaryndaky sahypalaryny ýapmagy makul bildi.

Şeýlelikde, häzirki wagtda Germaniýanyň ýygyndysynyň esasy ýyldyzlarynyň birine öwrülen Undaw sosial ulgamlary ulanmaýar.

Onuň ýene bir üýtgeşik endigi bar. Futbol butsylaryny adaty halta däl-de, zibil haltasynda saklaýar. Hüjümçi muny olaryň ýakymsyz ysynyň beýleki zatlara geçmeginiň öňüni almak üçin edýändigini aýdýar.

Zawodda işläp, höwesjeň ligalarda çykyş eden futbolçy häzirki wagtda dünýä çempionatynyň iň netijeli oýunçysyna öwrüldi. Bäş netijeli hereket bilen öňe saýlanan Deniz Undaw Germaniýanyň milli ýygyndysynyň esasy umytlarynyň biri bolup durýar.