TÝL - 2026. 11-nji tapgyr tamamlandy

Türkmenistanyň futbol çempionatynyň Ýokary ligasynda 11-nji tapgyryň duşuşyklary 30-31-nji maý günleri geçirildi.

Tapgyryň iň uly hasaply ýeňşi Aşgabat şäherinde boldy. "Nusaý" stadionynda geçirilen duşuşykda «Aşgabat» topary «Merwi» 5:1 hasabynda ýeňdi. Duşuşykda ýer eýeleriniň ilkinji goluny 44-nji minutda Merdan Muhadow geçirdi. Ikinji ýarymda Şatlyk Gurbanow 65-nji minutda hasaby artdyrdy. Pirmyrat Sultanow bolsa 69-njy, 79-njy hem-de 84-nji (11 metrlik jerime urgusy) minutlarda tapawutlanyp, het-trik etdi. «Merwiň» ýeke-täk goluny 86-njy minutda Abdyresul Abdyýew geçirdi.

Türkmenbaşy şäherindäki "Şagadam" stadionynda geçirilen duşuşykda çempionatyň lideri «Arkadag» myhmançylykda «Şagadamy» 4:1 hasabynda ýeňdi. Myhman toparyň gollaryny 5-nji minutda Rahman Myratberdiýew, 45-nji minutda Daýanç Meredow, 70-nji minutda 11 metrlik jerime urgusyndan Güýçmyrat Annagulyýew we 79-njy minutda ýene-de 11 metrlik jerime urgusyndan Resul Hojaýew geçirdi. «Şagadamyň» ýeke-täk goluny bolsa birinji ýarymyň goşulan wagtynda, 45+2-nji minutda Guwanç Waliýew öz adyna ýazdyrdy.

Balkanabat şäherindäki "Sport toplumy" stadionynda geçirilen duşuşykda «Nebitçi» topary «Köpetdagy» 1:0 hasabynda ýeňmegi başardy. Duşuşykdaky ýeke-täk goly 17-nji minutda Seýitmämmet Hojamämmedow geçirdi.

11-nji tapgyryň jemleýji we iň garaşylan duşuşygy Aşgabat şäheriniň Büzmeýin etrabyndaky "Sport toplumy" stadionynda geçirildi. Onda «Altyn Asyr» bilen «Ahal» toparlary 3:3 hasabyndaky netijeli deňlige razy boldular. Duşuşykda Myrat Annaýew 3-nji we 25-nji minutlarda tapawutlanyp, «Altyn Asyry» öňe çykardy. Şeýle-de Begençmyrat Myradow 37-nji minutda ýer eýeleriniň üçünji goluny geçirdi. «Ahalyň» düzüminde bolsa Magtymberdi Berenow 15-nji we 22-nji minutlarda iki gezek tapawutlandy, Ruslan Priýew bolsa 71-nji minutda hasaby deňledi. Duşuşykdan soň «Ahalyň» futbolçysy Bezirgen Pürliýew meýdandan çykaryldy.

11-nji tapgyrdan soň Türkmenistanyň Ýokary ligasynyň ýaryş tertibinde «Arkadag» 33 utuk bilen birinji orny eýeleýär. «Ahal» 21 utuk bilen ikinji, «Altyn Asyr» bolsa 20 utuk bilen üçünji ýerde ýerleşýär.

Iň köp gol geçiren futbolçylaryň sanawynda «Arkadagyň» hüjümçisi Didar Durdyýew 9 gol bilen öňdeligi saklaýar. «Ahalyň» futbolçysy Süleýman Mirzoýew 6 gol bilen ikinji, «Şagadamyň» oýunçysy Serdar Gulyýew bolsa 5 gol bilen üçünji orunda barýar.

Duşuşyklaryň netijelerini we ýaryşyň tablisasyny biziň "Netijeler" bölümimizden yzarlap bilersiňiz.