TÝB - 2026. 9-njy tapgyryň iki duşuşygy geçirildi

Ýokary liganyň toparlarynyň ýaşlar düzümleriniň gatnaşmagynda geçirilýän futbol boýunça Türkmenistanyň birinjiliginde 9-njy tapgyryň iki duşuşygy 19-njy maýda geçirildi. Geçirilen oýunlarda jemi bäş gol derwezelere geçirildi.

Balkanabat şäherindäki "Sport toplumy" stadionynda geçirilen duşuşykda «Nebitçi II» topary «Merw II» toparyndan 2:0 hasabynda üstün çykdy. Duşuşykdaky ähli gollary Elýas Agöýliýew geçirdi. Ol ilki 53-nji minutda bellenen 11 metrlik jerime urgusyny dürs ýerine ýetirip, toparyny öňe çykardy. Soňra 81-nji minutda ýene-de 11 metrlik jerime urgusyndan tapawutlanyp, duşuşygyň soňky hasabyny kesgitledi.

Tapgyryň beýleki duşuşygy Awaza milli syýahatçylyk zolagyndaky "Futbol meýdançada" geçirildi. Bu ýerde «Şagadam II» topary «Aşgabat II» toparyny kabul edip, 2:1 hasabynda ýeňiş gazandy. Meýdan eýeleri duşuşyga işjeň başladylar we 17-nji minutda Didar Nazjanowyň goly bilen hasapda öňe saýlandylar. Aradan kän wagt geçmänkä, 28-nji minutda Arzuw Söýjanow tapawutlanyp, «Şagadam II-niň» artykmaçlygyny iki gola çykardy. Ikinji ýarymda myhman topar hasaby azaltmagy başardy. 64-nji minutda Myratnazar Jumanazarow gol geçirip, «Aşgabat II-niň» ýeke-täk goluny öz adyna ýazdyrdy. Şeýle-de bolsa, duşuşygyň galan bölüminde başga gol geçirilmedi we oýun «Şagadam II-niň» 2:1 hasabyndaky ýeňşi bilen tamamlandy.

Şeýle-de ýaryşy guraýjylar tarapyndan 9-njy tapgyryň beýleki iki duşuşygynyň senesiniň üýtgedilendigi habar berildi. Galan oýunlaryň geçiriljek wagty barada goşmaça maglumatlaryň soň yglan edilmegine garaşylýar.

Duşuşyklaryň netijelerini we ýaryşyň tablisasyny biziň "Netijeler" bölümimizden yzarlap bilersiňiz.