TÝB - 2026. 6-njy tapgyryň netijeleri

Türkmenistanyň futbol boýunça ýaşlar birinjiliginde 6-njy tapgyryň ähli duşuşyklary tamamlandy. Tapgyrda geçirilen dört oýunda jemi 7 gol geçirilip, gollara baý tapgyr bolmady.

Tapgyryň ilkinji duşuşygy 1-nji maýda Mary şäherindäki "Merw" stadionynda geçirildi. Bu ýerde «Merw II» topary «Köpetdag II» toparyny kabul etdi. Duşuşykda toparlaryň hiç biri tapawutlanyp bilmedi we oýun 0:0 hasabyndaky deňlik bilen tamamlandy.

Şol gün Aşgabat şäherindäki "Aşgabat" stadionynda geçirilen duşuşykda «Ahal II» topary «Nebitçi II» toparyndan 2:0 hasabynda üstün çykdy. Duşuşykdaky ilkinji goly 45+2-nji minutda Medetgeldi Çaryýew geçirdi. Ikinji ýarymda bolsa Azatmuhammet Hajyýew 80-nji minutda tapawutlanyp, toparynyň ýeňşini berkidetdi. Şeýlelikde, «Ahal II» möhüm üç utugy gazanyp, ýokary orunlar ugrunda göreşini dowam etdirdi.

2-nji maýda geçirilen duşuşyklaryň birinde «Arkadag II» topary «Aşgabat II» topary bilen duşuşdy. Gökdepe etrabynyň Babarap geňeşligindäki "Sport desgasy" stadionynda geçirilen oýunda meýdan eýeleri 2:1 hasabynda ýeňiş gazandy. «Arkadag II» toparynyň ilkinji goluny 41-nji minutda Annamuhammet Rejepow geçirdi. Myhman topar 88-nji minutda Rahmanberdi Orazmuhammedowyň goly bilen hasaby deňledi. Emma duşuşygyň goşulan wagtynda, 90+2-nji minutda Gurtmyrat Datdow 11 metrlik jerime urgusyny dürs ýerine ýetirip, «Arkadag II» toparyna ýeňiş getirdi.

Tapgyryň soňky duşuşygy Aşgabat şäheriniň Büzmeýin etrabyndaky "Sport toplumy" stadionynda geçirildi. Bu ýerde «Altyn Asyr II» topary «Şagadam II» toparyndan 2:0 hasabynda üstün çykdy. Duşuşygyň esasy gahrymany ýene-de Weýisgeldi Orazdurdyýew boldy. Ol 64-nji hem-de 90+1-nji minutlarda tapawutlanyp, toparyna ýeňiş getirdi.

6-njy tapgyrdan soň ýaryş tertibinde «Arkadag II» topary 16 utuk bilen birinji orny saklap galdy. «Ahal II» topary 11 utuk bilen ikinji orna çykdy. «Altyn Asyr II» topary bolsa 10 utuk bilen üçünji ýerde ýerleşdi.

Iň köp gol geçirenleriň sanawynda «Altyn Asyr II» toparynyň hüjümçisi Weýisgeldi Orazdurdyýew öňdeligini has-da berkitdi. Ol häzirki wagta çenli 11 gol geçirip, birinji orny eýeleýär. «Ahal II» toparynyň oýunçysy Medetgeldi Çaryýew 7 gol bilen ikinji ýerde ýerleşýär. «Nebitçi II» toparyndan Elýas Agöýliýew bolsa 5 gol bilen üçünji orny eýelemegini dowam etdirýär.

Duşuşyklaryň netijelerini we ýaryşyň tablisasyny biziň "Netijeler" bölümimizden yzarlap bilersiňiz.