UCL. Çärýek final başlaýar: esasy dalaşgärler meýdança çykýar

Ýewropanyň iň abraýly toparlar ýaryşy bolan Çempionlar ligasynda çärýek final tapgyryna badalga berilýär. Bu gün ilkinji iki duşuşyk geçiriler we olaryň ikisinde hem möwsümiň esasy dalaşgärleri güýç synanyşar.

Londonyň «Arsenal» topary Lissabonda «Sporting» topary bilen duşuşar. Bilermenleriň pikirine görä, «Arsenal» bu möwsümde kubogyň esasy dalaşgäri hasaplanýar. Portugaliýanyň topary üçin bolsa çärýek finala çykmak eýýäm taryhy üstünlik bolup durýar. Şeýle-de bolsa, «Sporting» ýarym finala çykmak üçin ähli güýjüni gaýgyrman göreşjekdigini mälim edýär.

Günüň beýleki duşuşygynda «Real Madrid» topary öz meýdançasynda «Bawariýa» toparyny kabul eder. Bu garşydaşlyk çärýek finalyň iň merkezi oýny hasaplanýar. Iki topar hem kuboga dalaşgärleriň hatarynda görkezilýär, emma olaryň birek-birege garşy oýnamagy sebäpli, olaryň biri ýaryşdan çykmaly bolar. «Bawariýa» häzirki wagtda gowy formada bolsa-da, «Real Madrid» Çempionlar ligasynda hemişe aýratyn güýç hökmünde tanalýar.

Iki duşuşyk hem 7-nji aprelden 8-nji aprele geçilýän gije sagat 00:00-da başlanar.