APL. Fernandez iki duşuşykdan çetleşdirildi

Londonyň «Çelsi» toparynyň baş tälimçisi Liam Rosenior toparyň kapitany Enzo Fernandez boýunça möhüm karara gelnendigini mälim etdi. Argentinaly ýarymgoragçy toparyň iň ýakyn iki duşuşygyndan çetleşdirildi.

Fernandez Angliýanyň kubogynda «Port Weýl» bilen boljak oýny hem-de Premýer-ligada «Mançester Siti» bilen geçiriljek duşuşygy sypdyrar.

Tälimçi bu karar barada şeýle diýdi: "Ol ertirki duşuşykda-da, indiki ýekşenbede «Mançester Siti» bilen boljak oýunda-da çykyş edip bilmez. Muny aýtmak meniň üçin ýeňil däl. Adam hökmünde onuň barada erbet zat aýdyp biljek däl, emma belli bir çäk geçildi we çäre görmeli bolduk".

Bu ýagdaý futbolçynyň soňky çykyşlary bilen baglanyşykly boldy. Fernandez interwýularynyň birinde geljekde Madridde ýaşamak isleýändigini aýdypdy. Şeýle-de ol öňki baş tälimçi Enso Mareskanyň wezipesinden boşadylmagyny tankytlapdy. Hut şol wakalardan soň täze tälimçi hökmünde Rosenior işe başlady.

Futbolçynyň wekili Hawýer Pastore bolsa bu çetleşdirmä nägilelik bildirdi. Onuň sözlerine görä, Fernandez hiç bir topary agzamandyr we «Çelsiden» gitmek isleýändigini aýtmandyr: "Ol diňe soraga jogap berdi we ýaşamak isleýän şäher hökmünde Madridi aýtdy. Bu ýerde başga many ýok".

Şeýle-de toparyň başga bir oýunçysy Moýses Kaýsedo hem mümkin bolan transfer baradaky gürrüňlere teswir berdi. Ol häzirki wagtda «Çelside» çykyş etmäge ünsi jemländigini, emma geljekde näme boljakdygyny öňünden aýdyp bolmaýandygyny belledi.

Şeýlelikde, «Çelside» halkara arakesmeden soň ýagdaý dartgynly bolup galýar we topar möhüm duşuşyklara esasy oýunçylarynyň birisiz çykmaly bolar.