"Gala" – tomusky futbol ýaryşynyň ýeňijisi boldy

21–25-nji iýul aralygynda “Aşgabat” köpugurly stadionynyň türgenleşik meýdançasynda 2011-nji ýylda doglan ýetginjekleriň arasynda tomusky dynç alyş möwsümine bagyşlanan futbol ýaryşy geçirildi. Bäsleşik "Geljekki olimpiýaçylaryň ýöriteleşdirilen çagalar-ýetginjekler sport mekdebiniň" (GOÝÇÝSM) açyk birinjiligi hökmünde guraldy.

8 toparyň gatnaşmagynda geçirilen duşuşyklar iki toparçanyň (“A” we “B”) çäginde alnyp baryldy. Ýarym finala «Gala», «Ýaşlyk», «Kuwwat» we «Merw» toparlary çykmagy başardy.

Ýarym finalda «Gala» bilen «Ýaşlygyň» arasyndaky duşuşyk 1:1 hasap bilen tamamlandy. Oýundan soňky 11 metrlik urgularda «Gala» 5:3 hasap bilen ýeňiş gazandy. Ikinji ýarym finalda bolsa «Kuwwat» – «Merwi» 3:0 ýeňip, finala çykdy.

Üçünji orun ugrundaky oýunda «Merw» topary «Ýaşlygy» 3:0 hasap bilen ýeňip, bürünç medala eýe boldy.

Final duşuşygynda «Gala» bilen «Kuwwatyň» arasyndaky duşuşyk çekeleşikli pursatlara baý boldy. «Gala» garşydaşynyň derwezesine jogapsyz 5 gol geçirip, 5:0 hasap bilen ýeňiş gazandy we ýaryşyň baş baýragyna mynasyp boldy.